A Udin al torne il ‘totem’ dai emigrants in Canadà

Al torne cui colôrs origjinaris e restaurât dal dut il totem dal parc Mc Bride di vie S. Denêl, a Udin. Il restaur de opare, donade 41 agns indaûr de comunitât dai nestris coregjonâi in Canadà in viste dal milenari de capitâl furlane, che si sarès celebrât intal 1983, al è stât fat dal Comun di Udin, te suaze di un progjet coordenât dal Ente Friuli nel Mondo in colaborazion cun Confartigianato Imprese Udine. Rimetût a gnûf e za ricolocât tal so puest al principi di cheste setemane, il totem al sarà screât miercus ai 27 di Lui cuntune cerimonie curte aes 9 e 30 di buinore, in presince dal sindic Pieri Fontanini, dai presidents di Friuli nel Mondo e di Confartigianato Imprese Udine Loris Basso e Graziano Tilatti. E sarà presinte ancje une delegazion de Federazion dai Fogolârs Furlans dal Canadà, in regjon par tignî il propri congrès. (A.I.) – 25.07.2022