A Spilimberc a rivin i Fogolârs par une fieste dople

Storiis di mosaics e mosaiciscj e, cuasi simpri, di emigrazion. Destins incrosâts che si cjataran di gnûf vinars ai 29 di Lui a Spilimberc: l’Ente Friuli nel Mondo cu la sô cunvigne, che e torne in presince, e la Scuele Mosaiciscj dal Friûl, che e celebre i siei cent agns. In concomitance cul incuintri anuâl dai Fogolârs Furlans, e scree ancje la mostre “Mosaics&Mosaics”. La zornade  e sarà speciâl ancje parcè che e rivarà une grande rapresentance dai Fogolârs talians, europeans e di Canadà, Argjentine, Brasîl, Venezuela, Usa, Australie e Gjapon, ducj in regjon dai 27 ai 31 di Lui pal congrès anuâl. Il colegament di ducj i 140 Fogolârs di Friuli nel Mondo al sarà in direte streaming sul sît di Telefriuli (www.telefriuli.it), che e trasmetarà dal Teatri Miotto di Spilimberc, ma ancje sui canâi dal digjitâl terestri. (A.I.) 20.07.2022