Vot cartulinis in onôr di Tavan

Intal 2014, a un an de muart, il festival vicino/lontano al veve dedicât al poete Federico Tavan une serade speciâl intal spazi de ex Glesie di S. Francesc. Il 2023 al segne dîs agns di cuant che, ai 7 di Novembar dal 2013, Federico al leve sù su la sô Nâf spaziâl pal so viaç cence fin. vicino/lontano 2023 lu onore cun vot cartulinis, consegnantlis al public che al volarà colezionâlis, cu lis peraulis di Aldo Colonello, Pierluigi Cappello, Anna De Simone, Rosanna Paroni Bertoia, Paolo Medeossi, Mario Turello e cun dôs poesiis di Ida Vallerugo e Rosanna Paroni Bertoia. A compagnâ i tescj a son vot fotografiis di Danilo De Marco. Lis cartulinis a saran a disposizion dal public a gratis intes sedis dal festival, fin domenie ai 7 di Mai. (A.I.) – 05.05.2023
Foto di Danilo De Marco