“Flât” e je la peraule sielte di Vicino/Lontano pe vincjesim seconde edizion dal festival , programade a Udin dai 7 ai 10 di Mai, cun events impuartants di anteprime che si fasaran intai dîs prime. “Ogni an – e sclaris Paola Colombo, presidente de associazion Vicino/Lontano – cirint di interpretâ il spirt dai timps, o identifichin une peraule tematiche tant che une lint par viodi il mont e la sô complessitât. Chest an, la direzion e à sielzût “flât, respirâ” parcè che o vivìn intun timp che, simpri di plui, nus gjave il flât ogni dì. Puartant achì a dialogâ i esperts di dissiplinis diferentis – de filosofie ae sience, de economie ae leterature, de gjeopolitiche ae spiritualitât – si domandarìn di ce che o varessin dibisugne par tornâ a tirâ flât, ducj adun. Il comitât sientific dal festival, vuidât dal antropolic Nicola Gasbarro, e i curadôrs Paola Colombo, Franca Rigoni e Álen Loreti, a son za in vore par meti adun il program, che al sarà anunziât tor la metât di Avrîl: plui o mancul cent events che a puartaran a Udin personalitâts dal mont de culture, de informazion e dal intratigniment, compagn di ogni an. Ai 9 di Mai tal Teatri gnûf “Giovanni da Udine” al sarà dât ancje il premi “Terzani”: la jurie, vuidade di Angela Staude Terzani, e je daûr a selezionâ i cinc titui finaliscj. (A.I.) – 03.03.2026
Foto di L. d’Agostino
