Universitât dal Friûl candidade a un premi pal restaur di un cine

La Universitât dal Friûl e je une des cinc candidadis pai “Oscar dal restaur”, i Focal international awards, che a saran dâts a Londre joibe ai 18 di Jugn te Church House (Cjase de Glesie) di Westminster. I “Oscars”, rivâts ae vincjesime tierce edizion, a ricognossin ogni an la ecelence te preservazion e restaurazion di cines storics e materiâi di archivi. La Universitât di Udin e partecipe cul restaur digjitâl dal cine britanic dal 1917 ““The German retreat and the battle of Arras” (La ritirade todescje e la bataie di Arras), un dai documentaris finanziâts dal guvier britanic vie pe Prime vuere mondiâl. Il lavôr al è stât ordenât ae Universitât furlane dal Museu Imperiâl de Vuere di Londre e al segne la prime candidature pal premi di un progjet fat in colaborazion cuntune universitât. La pelicule e je stade restaurade dal laboratori “La camera ottica” dal Media Lab dal Dipartiment des siencis umanis e dal patrimoni culturâl. (A.I.) – 16.06.2026