Une vôs de bande de ‘justizie climatiche’

Storiis di clime, di sience e di umanitât. La tierce edizion dal progjet “La memoria del legno” (La memorie dal len”), il cartelon di divulgazion de culture de sostignibilitât ambientâl, civiche sociâl, in program dai 13 di Novembar e fint ai 6 di Març dal an che al ven, al e tache martars ai 28 a Brugnere, aes 6 e mieze di dopomisdì te biblioteche, cuntune lezion de gjornaliste e scritore Sara Segantin, ambassadore pal pat european dal clime e une des fondadoris dai “Fridays for future”, i vinars pal avignì. L’incuintri, inmaneât di Damatrà, al permetarà di cognossi i temis che la scritore e puartarà dai 10 ai 21 di Novembar in Brasîl pe “COP 30”, la Conference des Nazions Unidis ator dai cambiaments climatics: soredut chei che a cirin di puartâ la justizie climatiche e la transizion bande di une economie verde e il disvilup sostignibil. Miercus ai 29, la scritore e fasarà un pâr di incuintris ancje pes scuelis di Spilimberc e Udin. (A.I.) – 27.10.2025