Daspò de mostre screade tal mês di Setembar te Cjase Cavazzini e prodote dal MAXXI di Rome, tal Museu de art moderne e contemporanie di Udin di “Cjase Cavazzini” si è vierte une gnove esposizion dedicade a Guido Guidi, nassût a Cesena tal 1941, un dai protagoniscj de fotografie internazionâl dai agns Sessante. Tai spazis dal Cjistiel, si pues viodi dut il lavôr che Guidi al à fat ator pe nestre regjon in trente agns: “Qui intorno. Progetti fotografici per il Friuli Venezia Giulia, 1985–2014” (Chi ator. Progjets fotografics pal Friûl-Vignesie Julie). La esposizion e puarte insom il il percors ator dal innomenât fotograf e tal stes timp e valorize i archivis dal teritori, massime chel dal CRAF, stant che e je part dal program di fotografie contemporanie inmaneât dal centri di Spilimberc par cure di Andrea Pertoldeo. Fint ai 6 di Avrîl, si podaran viodi i lavôrs fats vire pai agns in progjets e laboratoris didatics inmaneâts di ents de Regjon (CRAF, ATER, Universitâts…) e lis fotos a son stadis fatis in plui di un lûc: a Triest, Spilimberc, Vençon, Lestans, Pielunc, Pinçan e Udin, Gurize, S. Vît dal Tiliment e Lignan. Un percors mai viodût prime, jessût dai archivis de fondazion Guidi, che al conte cuntun voli diferent il nestri teritori. (A.I.) – 18.12.2025
Foto di G. Guidi
