In regjon a son 600 mil citadins che a fevelin furlan, ma ogni an cheste cifre e cale in medie dal 0,6 par cent. Se no si fasès nuie, intal 2050 si pierdaressin cent mil furlanofons. L’obietîf al è fermâ cheste decressite, ancje doprant struments inovatîfs tant che il tradutôr automatic furlan-talian su Google.
Lu à dit William Cisilino, diretôr de Agjenzie regjonâl pe lenghe furlane, intal cors de sô relazion che e à viert i intervents de taule taronde su promozion e valorizazion des minorancis linguistichis, moderade di Fabiana Fusco, docent de Universitât di Udin, e ospitade intal auditorium Comelli inte sede de Regjon di vie Sabbadini.
“O vin di jessi prudents cuant che o fevelìn dai furlans come di une maiorance linguistiche in chest teritori – al è l’invît di Cisilino – parcè che i numars reâi a disin che al è ancjemò tant ce fâ par evitâ la decressite e la jevade de etât medie di cui che al fevele la marilenghe. Di sigûr, dut câs, la situazion ancjemò no je comprometude e a son grancj margjins di miorament. Il Plan gjenerâl di politiche linguistiche 2021-25 al à propit l’obietîf di fermâ chest câl dal numar. O savìn che a son des tecnichis specifichis par rivâ a chest risultât. Lis esperiencis dal Galles e dai Paîs Bascs a àn dimostrât che al è pussibil invertî la tindince”. (ADG) – 21.10.2022
