Un scritôr a Lignan al conte… di se

Ce fasial un scritôr, invidât a un dai tancj events inmaneâts tes localitâts di mâr, cun ospits di ogni sorte, dulà che la notorietât dal ospit e je fondamentâl pal sucès dal event, e nol impuarte ce che si dîs, tant ancje chel timp al passarà cence lassâ un segn? Ce fasial un scritôr vêr, che magari al vîf un ingôs, une pôre, un desideri di amôr privât che nol è il câs di meti in place li, denant di ducj? Il scritôr al sa ben che lis peraulis no lassaran nissun segn, intant che il so pinsîr e la passion a lavoraran dentri di lui, adun cu la sô sensibilitât plui fonde… “Ce ch’al fâs un scritôr” (scrit cussì) al è il titul de gnove leture seniche curade dal Teatri Stabil Furlan, gjavade fûr de racuelte “Lignano ti racconto”. O miôr: la version par furlan dal libri cu lis contis ambientadis a Lignan, scritis pe manifestazion “Incuintris cui autôrs e cul vin”. Compagnât al violoncel di Riccardo Pes, il diretôr artistic dal Tsf, Massimo Somaglino, daspò di ve lavorât cun atôrs, musiciscj e tradutôrs, al presente vinars al prin di Avost cheste leture seniche tal Pala Pineta, contant la storie ‘circolâr’… de presentazion di un scritôr dentri de manifestazion. (A.I.) – 31.07.2025