Un saç su la ‘assence’ dal furlan a GO!2025

GO!2025 al è nassût tant che un progjet che al torne a vitalizâ il rûl di crosade di culturis che Gurize e à simpri incjarnât inte sô storie milenarie. Alc però al continue a impedî che a vegnin sù lis tantis animis di une citât mosaic, che e ven presentade tant che il pont di incuintri dal mont talian cun chel sloven, ignorant lis tantis altris componentis che a àn convivût inte citât, tacant di chê furlane. Par chest “La Patrie dal Friûl” e à volût stampâ un volum provocatori par furlan e par inglês che intes dôs versions si intitule “Fûc su Gurize” e “Under Fire”, e che al vignarà presentât a Gurize joibe ai 3 aes 6 di dopomisdì te Cjase Ascoli e a Udin vinars ai 4 in Sale Ajace. Za intal 1993, Gianni Nazzi al veve fevelât dal argoment intal so saç “La defriulanizzazione di Gorizia” e di pôc Ferruccio Tassin al à fat une altre analisi cuntun saç articolât su la identitât furlane di confin, “Un popolo mancato”. Par chest “La Patrie dal Friûl” e à volût tornâ a publicâ adun chescj doi saçs intun volum bon di presentâ la situazion paradossâl di une citât che e je il spieli de Europe, ma che e somee impuaride di une des sôs identitâts costitutivis. (A.I.) – 02.04.2025