Un ricognossiment di presi pal Museu de radio di Pasian

Il ricognossiment di presi al rive inte date plui simboliche pussibil, la Zornade Mondiâl de Radio, ai 13 di Fevrâr, consacrant il MIRS, il Museu Interatîf de Radio e de Societât, tant che un dai museus plui autorevui dal panorame nazionâl dedicât ae storie dai mieçs di comunicazion e de comunicazion. La Fondazion Guglielmo Marconi e à dât in maniere uficiâl il so patrocini al museu di Pasian di Pordenon. La notizie e à un significât istituzionâl e culturâl une vore fuart, cuntun significât ancjemò plui grant stant che al rive pal aniversari internazionâl che al celebre la radio tant che strument pe cognossince, il dialic e la democrazie. Ai 13 di Fevrâr dal 1946, la prime trasmission radiofoniche des Nazions Unidis e fo trasmetude de sô sede uficiâl a New York e la date e je stade sielte de UNESCO par ricuardâ il rûl universâl di chest mieç. Il patrocini de Fondazion Guglielmo Marconi, une istituzion di lustri internazionâl dedicade a vuardâ e promovi la ereditât sientifiche dal grant inventôr talian, al rapresente un pas fondamentâl pe incressite dal MIRS, confermant la cualitât dal so program di visitis culturâls, sientifichis e educativis, che in pôc plui di un an al à tirât dongje passe cinc mil visitadôrs. (A.I.) – 11.02.2026