Un mosaic di Aquilee restaurât e puartât a Rome

Tal Palaç des esposizions di Rome a son in mostre dai 28 di Otubar e fint ai 18 di zenâr dal an che al ven 128 oparis dal patrimoni artistic talian di dutis lis regjons, fatis dal decim cuint secul prime di Crist fint al 1965. “Restituzioni 2025” al fâs part di un program, rivât ae vincjesime edizion, di Intesa Sanpaolo, che al à permetût di restaurâ passe 2200 oparis dal patrimoni public nazionâl. Ancje te nestre regjon il program al à consintût di restaurâ cualchi opare di art che e rapresente ben la storie dal teritori e lis colezions che za a esistin. Par esempli, il Mosaic cui dolfins de Vile de Ponte di Monfalcon, fat tal prin secul daspò di Crist, cjatât dongje de lagune tai agns setante dal secul passât adun cuntune barcje di len che si cjate tal museu di Aquilee. (A.I.) – 28.10.2025