Simpatic, interatîf, sempliç, diret, origjinâl. Cui che lu à za vût let al à comentât cussì “Il libro gatto” di Silvia Borando (ed. minibombo). Un volum par fruts dai 3 agns insù che cumò al à ancje une version in lenghe furlane, cun traduzion par cure di Alessio Potocco, editade de ARLeF – Agjenzie regjonâl pe lenghe furlane. “Il libri gjat” – chest il titul par furlan – al è un libri di figotâ, di strenzi e di cjapâ tal braç, te stesse maniere che si fasarès cul propri tui.
Daûr de iniziative de ARLeF, il test al sarà presentât ai piçui letôrs sabide ai 20 di Mai aes 4.30 dal dopomisdì, te sezion “Moderne” de Biblioteche Civiche “Vincenzo Joppi” di Udin (rive Bartolini, 5). Dopo de leture animade dal librut che al vignarà regalât ai fruts presints, al sarà un laboratori interatîf par cure di Maura Storelli; ae fin e sarà ancje la mirinde par ducj!
La iniziative, indreçade ai fruts des scuelis de infanzie e primariis, e jentre tal cartelon de Setemane de Culture Furlane – promovude de Societât Filologjiche Furlane – e tai apontaments in program par “Aspettando la notte dei lettori” dal Comun di Udin.
Par partecipâ ae iniziative si consee la prenotazion dentri di miercus ai 17 di Mai, telefonant al 0432-1743400 o mandant une email a info@sportelfurlan.eu. (A.D.G.) – 16.05.2023
