Un incuintri inspietât, un viaç emozionant che al segne il principi di une lungje e preziose amicizie tra un frut speciâl, Jack, nassût intune piçule localitât culinâr dal Friûl, e un peluche fûr dal comun, Bee, une avute che di tant timp e jere bandonade intune buteghe di Birmingham, in Ingletiere.
Cheste e je la storie contade intes pagjinis di “La storie vere di Jack e Bee”, il libri par fruts in lenghe furlane publicât de Cartostampa Chiandetti in colaborazion cu la ARLeF – Agjenzie regjonâl pe lenghe furlane. Scrit di Alessandra Guadagnin, al conte di une amicizie speciâl par ricuardânus che crodi in se stes e intai propris siums al è une vore impuartant. “L’avignî al è di cui che al crôt ae bielece dai siei siums”, e recite la citazion iniziâl dal libri.
Sabide ai 13 di Zenâr, aes 4.30 dopomisdì, te sezion “Moderna” de Biblioteche Civiche “Vincenzo Joppi” di Udin (rive Bartolini, 5), in graciis de colaborazion tra ARLeF, Comun di Udin e Chiandetti, il test al sarà proponût ai piçui letôrs (etât dai 4 ai 9 agns). Daspò de leture animade dal libri, une copie e vignarà regalade a ducj i fruts presints, al sarà un laboratori creatîf cu la âf Bee.
Di là dal invît a partecipâ, la autore, che e sarà presinte al incuintri, e à marcât che: “Al è fondamentâl insegnâur ai fruts la impuartance di rivâ a viodi il biel che al è dentri di nô e in chei altris. Ognidun al puarte dentri di se une valisute siore di talents, si à dome di vierzile, cjalâ dentri e doprâ i struments che si àn par fâ vignî fûr lis propris fuarcis. Par chest motîf o vuei invidâ i fruts, ma ancje cui che ju eduche, a discuvierzi i lôr ponts di fuarce, a acetâju, amâju e nudrîju, cemût che si fâs cuntune plante par che e cressi sane e fuarte (e contente!)”. (a.d.g.) – 02.02.2024
