Ultimis “Stanziis dal vin” viertis pal festival di EnoSatire

Si siere l’itinerari di “Eno(Satire)”, il lunc viaç transfrontalîr inmaneât dal Moviment Turisim dal Vin dal Friûl-Vignesie Julie intune cuindisine di aziendis vitiviniculis storichis de regjon e de Slovenie. Un percors prin di dut enoturistic, che si è davuelt lant daûr dal fîl ros de satire. Vinars ai 11 aes 5 di dopomisdì li di Venica&Venica a Dolegne e sabide ai 12 aes 11 di matine te aziende di Livio Felluga te Badie di Rosacis a saran screadis lis “Stanziis dal Vin”: galariis cun espostis lis vignetis dal concors internazionâl “Spirito diVino”. Prime dal grant festival internazionâl di Eno(Satire) che si davuelzarà a Gurize ai 26 e ai 27 di Avrîl, a saran doi dîs di fieste, riflessions, confronts, dibatiments, cercis, visitis vuidadis e cetant altri. (A.I.) – 10.04.2025