Udin, cuatri dîs di fieste pai letôrs

Daspò di une anteprime itinerante in 30 Comuns cuntun centenâr di incuintris, e rive in citât – di joibe ai 6 a domenie ai 9 – la decime prime edizion di “La notte dei lettori” (La gnot dai letôrs), inmaneade dal Comun di Udin in colaborazion cu lis librariis e la poie de Regjon F-Vj e de Fondazione Friuli. Il viaç al è il teme di chest an, sielt de diretore artistiche Martina Delpiccolo, spiegât di une citazion che e memoree Franz Kafka intal centenari de sô muart. A son passe 30 i lûcs dal festival in citât, “stazions” dal viaç (teatris, placis, lozis, bibliotechis, librariis, museus, parcs…) in centri e intai borcs, animadis di leturis, spetacui, mostris, incuintris, zûcs, dibatiments… Plui di 60 i incuintris, dîs lis mostris o i spetacui par cure dai Museus de citât, cinc lis realtâts teatrâls tiradis dentri. Intal program ancje dîs spetacui teatrâi o leturis senichis, dîs iniziativis pe infanzie, cinc incuintris di poesie, un “conciert pe pâs” e ospits tant che Enrico Galiano, Luca Bianchini, Federica Manzon, Ascanio Celestini, Giulia Morello, Mauro Covacich, Gianmarco Villalta, Toni Capuozzo… (A.I.) – 06.06.2024