Turisim a fumets par scuvierzi Pordenon

“Le incredibili avventure di Marco in Friuli Venezia Giulia. Pordenone” (Lis aventuris di no crodi di Marco in Friûl-Vignesie Julie. Pordenon) al è il titul dal setim album ilustrât de serie “Turisim a fumets”, finanziât de Regjon, cu la senegjature di Marco Tonus e lis ilustrazions e grafichis par cure di Valentina Angelone. Chest volum, il prin intun grup di trê publicazions progjetadis pe Capitâl taliane de culture dal 2027, al è un progjet dal Palaç dal Fumet (che lu presentarà vinars ai 6 aes cinc di dopomisdì). Il viaç dal “Turisim dai Fumets” al è scomençât a Aquilee, al à visitât lis bielecis naturâls di Polcenic, al è stât inmagât di Spilimberc, al à esplorât lis Valadis di Natisone e il lât di Doberdò, Gurize e Gnove Gurize e i segrets di Cjasarse. In chest volum, il protagonist al è un frut di prime medie, in viaç a Pordenon cu la sô classe, là che al “interviste” la statue dal pitôr Giovanni Antonio de’ Sacchis, “il Pordenone”, e al scomence cussì un viaç plen di scuviertis. (A.I.) – 05.03.2026