“TreeArt Festival” a Buri, capitâl dai arbui

Un pâr di mês indaûr, il comun di Buri al à cjapât il premi internazionâl “Tree City of the World 2025”, la citât dai arbui dal mont, dât ai lûcs che a spichin pe lôr gjestion sostignibile, struturade e continue dal patrimoni urban dai arbui. Un ricognossiment che nol è rivât a câs, stant che di siet agns tal parc de vile di Toppo Florio si fâs une rassegne uniche, il “TreeArt Festival”: un lûc di incuintri de ricercje sientifiche e de divulgazion cu lis arts visivis e il spetacul, là che i arbui a deventin il simbul di une gnove aleance jenfri om e ambient. Vuardians e custodis de memorie, i arbui a vivin un timp lunc che al invide ducj a imagjinâsi un avignî plui responsabil. Il timp al è propit il teme sielt chest an dal comitât sientific de rassegne, dentri di un progjet di trê agns che po dopo al frontarà ancje il spazi e la etiche. Dai 9 ai 12 di Lui, cuntune anteprime sabide ai 4, tal sflandorôs parc de vile e sarà presentât un program dut dedicât al timp, “il ritmi de tiere”, che al conferme la rassegne un dai laboratoris cultuâi plui origjinâi dedicâts al vert citadin. Il program al instrece incuintris, conferencis, spetacui dal vîf e mostris di art, cun cetantis iniziativis par fameis e fruts, ma soredut une schirie di esperts, pronts a discuti di paisaç, ecologjie, avignì e ducj i argoments leâts ai arbui. La innomenade sienziade Gabriella Greison e je dome un dai nons di esperts che a saran a Buri, adun cu la coreografe Michele Lucenti e il so Balletto Civile, i percussioniscj gjaponês Munedaiko, la BaRock Orchestra e dute le schirie di esperts di architeture e urbanistiche “verde”, ma ancje scritôrs e artiscj. Un di chei, Giorgio Celiberti, 96 agns, il plui zovin a partecipâ ae Bienâl di art di Vignesie dal 1948 e il plui vieli in chê di chest an, al screarà une mostre personâl za joibe ai 9 di Lui, lassant al museu tal viert dal parc une sô sculture permanent, in linie cul teme dal festival. (A.I.) – 08.07.2026