“Topolino” ator par Gurize a cirî un tesaur

A Gurize e Gnove Gurize a rivin gnûfs ospits di ecezion: Zio Paperone, Paperino e Qui, Quo, Qua, i famôs personaçs dai fumets, inventâts di Walt Disney. In ocasion di GO! 2025, Topolino, il setemanâl a fumets plui preseât de Italie al propon une gnove storie, “Zio Paperone e l’enigma del vecchio castello”,che e ven fûr tal numar 3626 dal gjornalut publicât di Panini Comics ai 21 di Mai. Une aventure transfrontaliere, firmade dal senegjatôr Niccolò Testi e dal dissegnadôr Giampaolo Soldati, la che Zio Paperone, compagnat dai siei nevôts, si cjate a frontâ un enigme dal cjistiel di Gurize che, daûr di une liende, al varès di scuindi un tesaur. La ricercje e passe par lûcs e simbui storics de citât, dal parc Piuma a palaç Strassolt, fint ae place de Transalpine: un esplorazion culturâl in linie cul teme de citât europeane de culture. (A.I.) – 20.05.2025