Tal Munistîr la colezion di art di Cividât

Il coridôr che al cjale sul Templi Langobart al prin plan si slungje fint ae ale a forme di crôs dal Munistîr di Sante Marie in Val, là che al jere la clausure: une schirie di piçulis celulis inondadis di lûs e cun biei barcons cun ramadis decoradis, che a dan acet a diviersis oparis di art e a deventin par se “celulis di art.” In chest plan cidin e cuiet, il comun di Cividât al à sielzût di meti dentri la sô colezion di art, che e je cressude vie pai agns in gracie di donazions gjenerosis di artiscj che a son dentri des mostris da citât, fatis di personis privadis e di citadins che a àn un leam speciâl cun Cividât. “La Quadreria”, une mostre permanente, si vierç miercus ai 13 aes cinc di dopomisdì. E je une colezion di plui di setante oparis, la plui part di artiscj furlans, che a cjape dentri dut il vincjesim secul fint in dì di vuê, tacant des pituris figurativis par rivâ a chês astratis e informâls, des grafichis aes incisions. Une atenzion particolâr e je pai artiscj di Cividât, tant che i fradis Giacomo e Luigi Bront e Aldo Colò, ma a son ancje oparis di Giorgio Celiberti, Colussa, Zavagno, Ciussi, Tavagnacco, Coceani e cetancj altris. (A.I.) – 12.05.2026