Storiis di emigrazion furlane te Americhe dal Sud

Prime rapresentazion furlane pal spetacul “Tant che une gote di aghe que cruzó el océano”, cjançons, letaris, ricuarts e l’avignî de emigrazion furlane in Argjentine e in Uruguay. Il conciert recitât firmât di trê nons di nivel de culture furlane contemporanie, il poete Maurizio Mattiuzza, la regjiste e atore Carlotta Del Bianco e il ghitarist e cjantautôr cjargnel Alvise Nodale, al rive joibe ai 4 te cort Morpurgo di Udin daspò di trê tapis fatis te Americhe dal Sud. Pensât tant che un viaç par tornâ a scuvierzi lis peraulis e lis notis plui altis de nestre tiere, dilunc des rotis de emigrazion dal Friûl inte Americhe, il progjet al è stât metût adun de Famee Furlane di Montevideo e de Sociedad Furlane di Buenos Aires, cu la poie dal ent “Friuli nel Mondo” e de Regjon F-Vj. Par furlan ma ancje par talian, spagnûl, inglês, la serade e presente tocs di leterature e di musiche furlane di îr e di vuê, ancje firmâts dai stes autôrs, messedâts cul patrimoni des comunitâts di emigrants furlans in Sudameriche. (A.I.) – 03.09.2025