Storie dal cine a Glemone, ve une pelicule sparide di agnorums

Miercus ai 22 tal cine “Sociale” di Glemone e tache la rassegne che la Cineteche dal Friûli e à inmaneât pe mostre “L’età dell’amore”, vierte tal mês di Lui tal Cjstiel cui tocs de colezion di Gianni Da Campo par contâ “une storie intime dal cine e dal fumet talian”. Sedi la mostre che lis proiezions, fint al mês di Març dal 2026, a son a jentrade libare cence sore nuie. Si tache cul cine che al dâ il titul ae esposizion, che al rapresente ancje l’incuintri – sul schermi – di un zovin cu la sô Muse, Marina Vlady, atore francese di divignince russe. “L’età dell’amore” di Lionello De Felice, che no si viodeve plui di agnorums, fat tal 1953, al è stât restaurât a pueste te version integrâl. Il cine al sarà presentât dal curadôr de mostre e de rassegne, Sergio M. Grmek Germani. (A.I.) – 21.10.2025