Si cirin i gjornaliscj dal avignì

Al è ancjemò pussibil notâsi fint ai 31 di Març pe cuinte edizion dal “Premio Leali Young”, inmaneât a Roncjis di Monfalcon de associazion Leali delle Notizie, che dai 9 ai 14 di Jugn e inmanee la decime seconde edizion dal Festival di gjornalisim. Il concors al è nassût in memorie de gjornaliste e vice presidente de associazion, Cristina Visentini, muarte masse adore tal 2021, par sostignî i zovins dai 18 ai 35 agns che a àn voie di deventâ gjornaliscj. Il premi (informazions su: lealidellenotizie.it) al vûl sburtâ cui che al à pardabon passion di tacâ la ativitât gjornalistiche e al cîr di promovi une jentrade tal mont de informazion. I partecipants (ancje i gjornaliscj za iscrits al ordin, o ben a une scuele di gjornalisim) a puedin sielzi dôs categoriis: articui (cjarte e rêt) e prodots multimediâi (investigazions cun foto o video e podcast). Il teme sielt al è il cambiament climatic: un comitât sientific al sielzarà i vincidôrs. (A.I.) – 24.03.2026