Ricuart di Pino Roveredo un an daspò de muart

Il festival “AlienAzioni” al ricuarde il scritôr triestin Pino Roveredo a un an de muart, a Duìn ai 21 di Zenâr dal 2023. E sarà la sale de parochie di S. Roc, a Gurize, a ospitâ l’apontament joibe ai 18 aes 8.30 sot sere: protagoniscj i gjornaliscj Alessandro Mezzena Lona e Elena Commessatti e i atôrs Giorgio Amodeo e Mauro Serio. La serade titulade “Un an cence Roveredo, il paladin dai ultins” e partirà dal 2005, cu la vitorie dal scritôr al premi Campiello in graciis di “Mandami a dire”, il libri di contis publicât di Bompiani. Chê sere – a disin – Roveredo al rideve come un frut, parcè che dopo vê passât la vite fasint marculis in rive sù, al scuvierzeve che il mont de leterature al crodeve intes sôs storiis, ancje se lui no si calcolave un scritôr, ma ‘un autist di peraulis’ sorevivent al alcul, ae droghe, ae preson e al manicomi. (A.I.) – 17.01.2024