Psicologjie, un festival pal benstâ

Seste edizion pal Festival de psicologjie in Friûl-Vignesie Julie, rassegne itinerante promovude de associazion “Psicoattività” di Palme par promovi la difusion de culture psicologjiche e il benstâ a dute la comunitât. Fint ai 3 di Avrîl, il diretôr sientific Claudio Tonzar al à inmaneât sîs apontaments ator dal teme “Psicologjiis di confin” par lâ insot de ricercje tacant dai studis di autôrs che a àn lavorât te nestre regjon, un teritori di confin, fevelant di creativitât, di musiche, di art, realtât, incussient… Il prin apontament al è za stât a Palme cuntune conference dedicade al psicolic Alberto Argenton. Ai 27 la rassegne e va indevant a Triest cuntun viaç tal Mont di Gaetano Kanizsa, psicolic e artist triestin. A sierâ la zornade, la cerimonie dal cuart premi pes ricercjis inovativis te psicologjie. In Març, apontament a Tavagnà cuntune conference dedicade a Giovanni Bruno Vicario, psicolic e scritôr udinês. Ai 13 a Gardiscje si fevelarà dal gurizan Paolo Bozzi e de psicologjie de musiche e ai 20 a Gurize si larà insot tal pinsîr di Anton Trstenjak, un dai prins psicolics slovens, par sierâ ai 3 di Avrîl a Cormons cu la modernitât dal psicoanalist Edoardo Weiss, un triestin che al à lavorât a New York. (A.I.) – 25.02.2026