Prime mostre a Udin inte suaze di “vicino/lontano”

Intal cont al ledrôs pal festival “vicino/lontano” 2025, te galarie “Make” di Udin e à viert “Bolivia”, mostre fotografiche di Danilo De Marco. Un viaç tra la int e cu la int par condividi umôrs e savôrs, simpri ae ricercje di une imagjin che e ufrissi veretât ae realtât. Traviers vincjevot fotografiis ineditis di Danilo De Marco, racueltis in trê viaçs fats in Bolivie – l’ultin intal Novembar dal 2024 – si jentre intal dolôr e inte fuarce de lote, inte pôre e intal cûr di un popul, intes pleis di une storie ancjemò discognossude ae plui part dai citadins dal mont. Danilo De Marco al sarà protagonist a “vicino/lontano” ancje dal incuintri dai 8 di Mai dedicât al storic riviel de aghe dal 2000 in Bolivie e, trê dîs dopo, dal avigniment senic “Cjantade pal Cid. Clics di libertât pai dîs che a vignaran”. (A.I.) – 22.04.2025