Presentade la 47e edizion de Fieste de Patrie dal Friûl

da Alessandro Di Giusto

Tarcint, la “Perle dal Friûl”, al darà acet ae 47e edizion de Fieste de Patrie dal Friûl par celebrâ i 947 agns de costituzion dal Stât patriarcjâl furlan, fondât ai 3 di Avrîl dal 1077. Il program une vore siôr de Fieste – inmaneade chest an dal Comun di Tarcint, de Regjon Autonome Friûl-Vignesie Julie e de Agjenzie regjonâl pe lenghe furlane – ARLeF, in colaborazion cul Istitût Ladin Furlan “Pre Checo Placerean” – al è stât presentât ai 3 di Avrîl inte sede di Udin de Regjon, cui intervents dal assessôr regjonâl aes Autonomiis locâls, Pierpaolo Roberti, dal president de ARLeF, Eros Cisilino, dal sindic di Tarcint, Mauro Steccati, e dal president dal Istitût Ladin Furlan, Geremia Gomboso.

Te stesse ocasion al è stât ancje presentât il gnûf video dal canâl YouTube in lenghe furlane “YouPalTubo”, La bandiere furlane tal spazi, là che si conte la storie di no crodi di Gregory Thomas Linteris, l’astronaute american di divignince furlane che al à puartât cun se la bandiere dal Friûl tal spazi. Linteris, che vuê al è inzegnîr mecanic tal Istitût pai standard e pe tecnologjie dai Stâts Unîts, une volte informât de iniziative al à acetât di intervignî ae presentazion cuntun messaç video là che al à contât cemût che, tal 1997, al à rivât a puartâ in orbite sul Shuttle la acuile furlane, mostrant il so grant leam cul Friûl.

“O soi pardabon sodisfat – al à marcât Roberti, ringraciant la ARLeF pal lavôr impuartant che e je daûr a fâ -. La Regjon e à invistît une vore in chescj agns inte promozion de lenghe furlane e par infuartî la identitât furlane vie par dut l’an: vuê o viodìn une rispueste dal teritori che al vûl puartâ indenant iniziativis di valorizazion propit pe ocasion de nassite dal Stât Patriarcjâl, ai 3 di Avrîl dal 1077. A son 70 i comuns dal Friûl-Vignesie Julie che a daran acet ai events in calendari pal 2024 cun 122 apontaments. Une edizion record, duncje, che di subit si è mostrade partecipade e preseade”.

“Se il Friûl-Vignesie Julie e je une regjon tant siore e diferente dal pont di viste culturâl e des tradizions – al à zontât – al è ancje in graciis des sôs particolaritâts linguistichis, tacant dal furlan par rivâ al sloven e al todesc”. Il rapresentant dal guvier regjonâl al à volût fâ il pont ancje su la impuartance di mantignî un nivel di cualitât alt: “Dome doi agns indaûr o vin presentât cu la ARLeF il gnûf canâl YouTube dedicât ai zovins e ae lenghe furlane. Vuê chest canâl al è rivât a cuasi 2 milions di visualizazions, tocjant e metint in contat furlans che a son a stâ no dome inte nestre regjon, ma ancje tal rest dal mont. Un canâl che al fevele aes gnovis gjenerazions, inte lôr lenghe mari e doprant i lôr mûts di espression: un altri sucès, un pas indenant impuartant par saldâ la nestre identitât cuntun voli bande l’avignî.

Il president de ARLeF, Eros Cisilino, che al à ringraciât ducj i presints, al à marcât il fat che chest an il cûr des celebrazions pai 947 agns de nassite de Patrie dal Friûl al sarà Tarcint, un dai lûcs simbul de identitât furlane, là che al è nassût il gjeniâl Chino Ermacora e là che pre Duili Cuargnâl al à cjatât bonstâ pes sôs preseadis ativitâts: a saran in tancj a celebrâ cun nô chei valôrs culturâi e linguistics che a rapresentin ad implen il popul furlan». Cisilino al à ancje ricuardât, cun sodisfazion, la varietât dai events in program in dut il Friûl: «Vê plui di 100 events colaterâi al è un sucès grant che al testemonee l’interès fuart des aministrazions comunâls, cu lis associazions, in cont de culture furlane che si celebre te Fieste. Al è un dât significatîf, come ancje il fat che a sedin sparniçâts in maniere compagne par dut il teritori furlan, sedi te nestre Regjon che in Venit, là che ancje i Comuns dal mandament di Puart a àn insiorât il calendari cun ativitâts interessantis. Un element indicatîf al è ancje il fat che ducj chescj events a vedin une grande frescjece e une proiezion bande l’avignî. Chest si lu capìs ben cjalant la fate des iniziativis, che in tancj câs a son stadis pensadis par stiçâ l’interès e la partecipazion ative des gnovis gjenerazions».

«O sin onorâts e braurôs di dâ acet a cheste edizion de Fieste de Patrie dal Friûl a Tarcint. Ancje la nestre “Perle dal Friûl” e sarà infin, par une dì, la capitâl dal Friûl, clamant dongje, ai 7 di Avrîl cu ven, il popul furlan par memoreâ i 947 agns de nassite de Patrie, un fat storic che la nestre comunitât si ricognòs ancjemò vuê tai siei principis», al à declarât il sindic di Tarcint, Mauro Steccati.

Geremia Gomboso, president dal Istitût Ladin Furlan “Pre Checo Placerean”, al à ricuardât cemût che al sedi un recupar des relazions tra lis minorancis linguistichis furlane, slovene e todescje, che a lavorin adun e a fasin scuadre. O crôt che chest al sedi un dât significatîf che si scuen marcâ propit in cheste ocasion di celebrazions. E je di fat une note positive, a pet di altris mancul buinis come la aprovazion mancjade dal messâl roman in lenghe furlane. Ma ancje il tant lavôr, ancjemò di fâ, intes scuelis e inte Universitât, lûcs clamâts a insegnâ la nestre storie ai zovins. Cence di chest lis fantatis e i fantats no savaran mai dal rûl che o vin vût e che o vin in Europe, sedi dal pont di viste politic che religjôs.

IL PROGRAM DE ZORNADE Lis celebrazions a tacaran in place Libertât, aes 9.30, là che al è previodût l’incuintri dai partecipants e, come par tradizion, la esposizion de bandiere dal Friûl, compagnade de Bande musicâl ex alpins di Cuie. Aes 9.45 il corteu si movarà bande il Domo (vie Rome), là che aes 10 i rapresentants des trê diocesis dal Friûl a disaran Messe par furlan, cun leturis e preieris ancje par sloven e todesc. La funzion e sarà acompagnade de Corâl “San Pietro Apostolo” di Tarcint. Des 10 indenant al larà in onde il speciâl “Fieste de Patrie” su Telefriuli (canâl 11) che al trasmetarà in direte la liturgjie e, subit dopo, la cerimonie civîl inte trasmission “Il campanile della domenica”. Finide la messe, aes 11, in place Rome, si esibissarà il grup folcloristic Chino Ermacora. Aes 11.30, inte sale Margherita (viâl Olinto Marinelli), a scomençaran lis celebrazions civîls cu la esecuzion dal Imni dal Friûl e la leture de Bole imperiâl. Dopo dal tradizionâl scambi de bandiere tra il sindic dal Comun che al à ospitât la manifestazion l’an passât (Caprive) e chel di chest an, a saran i salûts des tantis autoritâts intervignudis. Tal dopomisdì, des 15.30 indenant, palaç Frangipane (place Cornelio Frangipane) al vierzarà lis puartis pai itineraris culturâi: a son in program lis visitis vuidadis ae mostre e al laboratori permanent dai Mascarârs, al Museu dal Grup Folkloristic Chino Ermacora e ae Mostre “Universo Donna” dal Circul Fotografic Grandangolo. Cui che al varà plasê, al podarà fermâsi a gustâ a Tarcint, cuntun menù a presit concuardât, di prenotâ, tal ristorant “Costantini” (a Cuelalt, tel. 0432.792372), te pizarie ristorant “Al Sole 2” (a Tarcint, 0432.785056), e tal ristorant pizarie “Al Tarcentino” (a Tarcint, 0432.785354).

I EVENTS COLATERÂI – Par anticipâ lis celebrazions dai 7 di Avrîl, il Comun di Tarcint al à in program une schirie di events colaterâi. Miercus ai 3 di Avrîl, des 3 dopomisdì indenant, inte sale Diamante dal Palaç Frangipane (place Cornelio Frangipane) si tignarà la cunvigne “Fantats, infants e zovinutis. Teatri pes gnovis gjenerazions e lenghis minorizadis”, inmaneât in colaborazion cul Teatri Stabil Furlan. In chê stesse dì, aes 20.30, inte sale Margherita (viâl Olinto Marinelli) al larà in sene il spetacul teatrâl e musicâl di e cun Dino Persello: “Il trio nus vuardi”. Vinars ai 5 di Avrîl, aes 11, l’Auditorium de scuele primarie “Olinto Marinelli” al darà acet a un incuintri cui arlêfs des classis cuartis, par cure dal Istitût Ladin Furlan Pre Checo Placerean, cu la presentazion dal fumet “3 di Avrîl 1077”. Simpri vinars, aes 18, inte Biblioteche Civiche “Pierluigi Cappello” e je invezit in program la presentazion dal libri “Quando le montagne si colorano di rosso”, di Stefania P. Nosnan.

Come ogni an, la celebrazion de Fieste de Patrie dal Friûl e je insiorade, su dut il teritori furlan, di un calendari plen di events culturâi colaterâi, tant che spetacui teatrâi, events musicâi, presentazion di libris e tant altri. A saran plui di cent i events promovûts di passe 60 Comuns che a àn aderît al bant pe poie aes manifestazions che a compagnin l’inovâl, promovût de ARLeF in atuazion de Leç n. 6/2015. (a.d.g.) – 03.04.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui