Premi leterari de Regjon Fvj: al vinç il scritôr Marco Balzano

Il scritôr Marco Balzano al è il vincidôr de tierce edizion dal premi leterari “Il racconto dei luoghi e del tempo” (la conte dai lûcs e dal timp), istituît de Regjon autonome cun la Fondazion Pordenonelegge: lu à comunicât a Triest la jurie dal Premi, componude dai curadôrs di pordenonelegge, de Assessore ae culture regjonâl, Tiziana Gibelli, e vuidade dal President de Regjon FVJ, Massimiliano Fedriga. “Balzano – al à sotlineât il President Fedriga – al è un scritôr sensibil al leam tra un lûc e la anime des personis, in particolâr ae profonditât de tradizion che si poie intes azions cuotidianis. Il Premi al è stât inmaneât tant che ricognossiment anuâl par promovi lis ecelencis culturâls dal Friûl Vignesie Julie traviers la opare leterarie di autôrs di riferiment dal nestri timp e par valorizâ la storie e il paisaç di cheste aree, cussì plene di diversitâts gjeografichis e di memoriis”. (A.I.) – 25.07.2022