Une fieste par ducj, par lei i libris ma soredut il nestri timp, là che i autôrs a puedin contâ lis lôr ultimis oparis e cjatâ i letôrs intun spazi speciâl che si cjate su la puarte de Storie. In struc al è “pordenonelegge”, la fieste dai libris e de libertât inmaneade a Pordenon pe vincjesime seste volte. Cinc dîs plens di apontaments, di miercus ai 17 e fint a domenie ai 21, par cirî di capî miôr il Mont là che si sin cjatâts a vivi, judâts des vôs e des peraulis scritis di centenârs di autôrs che a vegnin di dutis lis bandis. La fiestone che si scree cul premi Nobel pe pâs dal 2003, la iraniane Shirin Ebadi, lis peraulis in video di pape Leone XIV e dal president Sergio Mattarella, e che e darà un premi speciâl (Crédit Agricole La storia in un romanzo) al scritôr spagnûl Ildefonso Falcones, e previôt passe 400 incuintris in cinc dîs. Cuasi siet cent i protagoniscj, talians e internazionâi, 56anteprimis di libris risiervadis al festival, 51 lûcs là che davuelzaran lis presentazions e i incuintris. E po dopo, 246 ‘agnui: i volontariis vistûts di zâl che a judin i autôrs e il public. I nons in mostre a son chei dal egjizian Ala Al-Aswani, dal ucrain Oleksii (Aleksej) Nikitin, dai francês Paul Richardot, Olivier Guez e Julia Deck il galês William Wall, i spagnûi Augustin Martinez, Paco Roca e Carole Martinez, il cravuat Robert Perišić… E po dopo ducj i amîs talians dal festival, di Viola Ardone a Michela Marzano, Stefano Nazzi, Giacomo Poretti, Mario Calabresi, Vittorino Andreoli e ducj chei altris. Il diretôr artistic Gian Mario Villalta , adun cui curadôrs Alberto Garlini e Valentina Gasparet, al à metût dongje une rassegne che e pense prin di dut ai zovins letôrs, che e à un spazi speciâl pe poesie e che di chest an e scomence a rifleti su la inteligjence artificiâl cence pôre e prejudizi, dant ancje la pussibilitât – virtuâl – di discuti e fevelâ cui grancj scritôrs de storie! Ma la storie di cumò e reste al centri cu la politiche, la Europe, lis vueris, il “gnûf ordin mondiâl”, la economie, la sience, la filosofie, ma ancje la art e il teatri (cul “festival dentri dal festival” che si clame “Parole in scena”, peraulis in sene, simpri cu la presince di nomons e grancj esperts de materie. E par sierà, un “Conciert pe Europe” in omaç a GO!2025 cu lis orchestris dal teatri liric di Triest e di Maribor, par vierzi tal stes moment il viaç che al puartarà tal 2017 a Pordenon capitâl de culture taliane. (A.I.) – 16.09.2025
Foto di J. Montazari
