Pordenonelegge cumò al va “fûr de citât” pai students

Sierade la vincjesime seste edizion di “pordenonelegge”, la Fieste dal libri e de libertât e va indevant sul teritori dai 7 di Otubar cul cartelon di incuintris leteraris pes scuelis “Fuoricittà_scuole”, in tredis comuns de (ex) provincie di Pordenon. Lis propuestis pes scuelis secondariis a previodin une schirie di nons di riferiment de sene leterarie dal nestri timp, tacant a Brugnere cun Alessandro Barbaglia, scritôr che al à vinçût il premi Strega par fruts 2021, che al presente in dialic con Odette Copat “il libri dal 2024 “Scusa ma resto qui”. Joibe ai 9, a S. Quarin, un grant naratôr dai sintiments, Matteo Bussola, in dialic cun Antonella Silvestrini par fevelâ dal so ultin romanç. Dai dîs – anzit, tes setemanis – che a vegnin, i ospits a saran Enrico Galiano, Guido Sgardoli, lis furlanis Chiara Carminati e Elena Commessatti, e ai 29 di Otubar Marta Palazzesi. (A.I.) – 07.10.2025