Poesiis furlanis scritis tant che i gjaponês

Un puint jenfri culturis diferentis, il Friûl e il Gjapon, ma no dome. Cuntun messaç di fradilance si pues meti in struc il prin libri di poesiis di Christian Romanini, nassût tal 1977, che cualchi an indaûr al veve fat l’esordi naratîf cul diari di viaç “Sul troi di Aquilee”, scrit dut par furlan. Ancje il gnûf lavôr leterari al è (ancje) in marilenghe: si intitule “Stagjons, haiku par furlan” e al ven fûr par l’editôr Campanotto. Miercus ai 30 di Avrîl al sarà presentât te librarie “Moderna” di Udin aes 6 di dopomisdì te suaze dai “Far East Film Festival Events”, la lungje schirie di apontaments de innomenade rassegne di cine orientâl, che e je rivade ae vincjesime setime edizion. Il volum al è in cuatri lenghis: furlan, talian, inglês e gjaponês (voltadis di Richard McKenna e Tomoko Sakurai) e al è un omaç a chel Paîs cussì lontan di noaltris, ma “par promovi la nestre lenghe e la nestre culture di là dai confins – al sclarìs l’autôr – Par vierzi il Friûl al mont, doprant lis peraulis di pre Checo Placereani e compagn di ce che il FEFF al fâs di cuasi trente agns”. (A.I.) – 29.04.2025