Peraulis e musiche in mont par un partigjan

La cuinte edizion di“Vicino/lontano mont”, la fieste dedicade aes tieris altis di chest teritori, e siere il so viaç traviers i lûcs de mont dal Friûl domenie ai 23 a Paluce. Tal teatri cine “Daniel”, aes sîs sot sere, al torne “Cantata par il Cid”, Cjantade pal Cid, “Fotos di libertât pai dîs che a vignaran”, un spetacul dedicât al partigjan Sergio Cocetta, che al à debutât tal mês di Mai dal an passât al festival “vicino/lontano” a Udin. Il spetacul al cjape dentri Danilo De Marco, Angelo Floramo, Massimo Somaglino – che al è ancje il regjist – Paolo Forte ae armoniche e une corâl feminine a cuatri vôs: Caterina Di Biaggio, Miriam Foresti, Eleonora Lana e Nicoletta Taricani. Il spetacul al è compagnât di cualchi curt video di Andrea Trangon e lis fotografiis di Danilo De Marco, che al cognossè Cocetta a Tarvis cuant che al jere piçul e po dopo al à cjapât sù i siei scrits, cjatâts intes cjantinis e int cjasis vecjis abandonadis, intun volum publicât dal editôr Forum. (A.I.) – 22.11.2025