Pasolini al esam di maturitât: “Il poete al è ancjemò vîf”

Nol jere mai sucedût prime, in cincuante agns de sô muart, ma biadelore il non e la opare di Pier Paolo Pasolini a son jentrâts tai esams di maturitât. Un dai titui ufierts ai students pe prime prove scrite di talian al tacave di une poesie scrite di zovin dal poete di Cjasarse, cence titul, “Appendice I”, gjavât fûr dal libri “Dal diario (1943-44)”. Une composizion fate di Pasolini cuant che al jere in Friûl, ma par talian, tai prins agns Cuarante: une riflession intime e lontane dal poete politic che al vignarà plui tart, là che al dopre une base classiche par fevelâ di zoventût. “E je stade une biele sorprese – al è il coment di Marco Salvadori, il president dal centri studis “Pasolini” di Cjasarse e ancjemò di plui pal fat che e je stade butade jù te sô fase di formazion, prime dal Pasolini plui cognossût, chel ‘roman’. La poesie e la sielte a confermin che a 50 agns de muart al è plui vîf e vivarôs di simpri e la sô vôs e conte ancje vuê la atualitât de Italie, in dialic cui zovins che si interessin simpri a lui. Lu disin i cetancj ospits dal centri studis, soredut i zovins academics de Italie e di dute Europe che a rivaran tal mês di Setembar pe cunvigne internazionâl”. (A.I.) – 18.06.2025