Paolo Zanussi: oparis di art e grafiche pe Universitât di Udin

In ricuart di Paolo Zanussi, grafic e dissegnadôr di divignince udinese. La femine Maria Faleschini e à donât ae universitât di Udin passe 2400 oparis dal artist, 900 volums di art, grafiche, dissens e ilustrazions e ancje bêçs: dut a pro dal Dipartiment di studis umanistics e dal patrimoni culturâl. Il fin al è chel di tirâ sù un centri dedicât propit ai studis di grafiche in memorie di Zanussi e de sô ativitât. Ae cerimonie di donazion te Universitât dal Friûl a jerin Maria Faleschini, il retôr dal Ateneu, Roberto Pinton e la diretore dal Dipartiment, Linda Borean. Lis oparis, sieltis di Alessandro Del Puppo, presidente de Comission patrimoni artistic de universitât, a son in detai: 309 albums cun ilustrazions, 56 incisions, 2040 dissens e 15 pituris in tecnichis diferentis. (A.I.) – 31.07.2025