52
La associazion “All’Ombra del Campanile” di Passons e à inmaneât tes salis espositivis di vie Villalta 2 la mostre “L’enigma sospeso: Campigli, de Chirico la ricerca oltre la realtà”, che e sarà screade vinars ai 31 aes 8 di dopomisdì. Par cure di Didier Zompicchiatti e Davide Zampis, la esposizion, vierte cun ingrès libar fint ai 11 di Novembar, e presente une selezion di oparis grafichis dai doi mestri de art taliane. Giorgio de Chirico al è ancjemò atuâl pal valôr universâl de sô piture metafisiche, tant che lis creazions di insium ma cuntun toc di classicitât di Massimo Campigli. Ducj i doi a son stâts dut câs grancj passionâts de art antighe. (A.I.) – 30.10.2025
