Mostre di Vile Manin: une “cerce” cuntun incuintri

In ocasion de mostre “Confini – Da Gauguin a Hopper” (Cunfins), che e sarà screade te Vile Manin di Passarian ai 11 di Otubar, la associazion udinese Amîs dai museus e de art e invide socis e amîs al incuintri cun Walter Zele, esperi di cine, che si davuelç martars ai 30 te sale cunvignis de fondazion Friuli a Udin, aes 5.30 di dopomisdì. “Il pittore della luce e la sala buia. Edward Hopper al cinema” (Il pitôr de lûs e la sale scure. Edward Hpper al cine”) al è il titul de presentazion che e sarà dedicade a un dai autôrs plui impuartants de mostre, contât intune maniere diferente, il rapuart de sô art cul cine, apont, stant che lis sôs pituris a somein lis incuadraturis di un cine. E po dopo, a son cetancj i regjiscj che vie pal timp a son stâts influençâts dal innomenât pitôr. (A.I.) – 29.09.2025