Mittelfest 2022, presentât il calendari

da autore

Al è un timp che nol finìs plui di cjapânus sot e di domandânus spazi pal inspietât chel che stin passant di plui di doi agns e che al à trasformât tant di chel che o clamavin “normalitât”. Ma al è dispès cussì che il futûr si fâs strade: cun avigniments che a parin impreviscj e che, invezit, a jerin daûr a meti lidrîs di timp in nô e tra di nô.

Di chestis riflessions e nas la XXXI edizion di Mittelfest – festival multidissiplinâr di teatri, musiche e danze di riferiment pe aree Centrieuropeane e balcaniche cun sede a Cividât, che chest an al frontarà propit il teme Impreviscj, tacant di une gnove imagjin là che si racuei, cemût che intune graphic novel, la densitât dai avigniments emerzûts e somerzûts che a determinin la sostance di une epoche. A fâlu, in bande dal festival plui grant, pal secont an al sarà ancje la rassegne Under 30 Mittelyoung, che al met in sene une gnove gjenerazion de Mitteleurope, dant a cheste une poie concrete par esprimisi.

I doi festivai internazionâi a saran in sene in maniere rispetive dal 12 ai 15 di Mai, Mittelyoung, e dal 22 ai 31 di Lui Mittelfest, intant che lunc dut l’arc dal an Mittelfest al va indevant sot dal non di Mittelland, cun avigniments che a dan continuitât al festival e lu identifichin tant che puint tra colaborazions europeanis e realtât dal teritori.
Cul titul “Impreviscj” il festival si propon duncje di ufrî ispirazions par lei il presint, partint di lidrîs che si ancorin ai aspiets mancul palês de Storie, e cjalant al doman e aes sôs potenzialitâts sedi umanis che tecnologjichis. In sene si alternaran tradizion e inovazion, nons afermâts e che a vegnin sù, intun dialic che al messede stîi e gjenars, cussì di fâ di chest apontament, ancje pe sô colocazion gjeografiche, un laboratori dal presint.

In numars, i doi festival a metaran in sene in complès 39 titui, cjapant artistis e artiscj di 15 diviers Paîs de Mitteleurope, dai Balcans e limitrofs (Italie, Svuizare, Gjermanie, Austrie, Paîs Bas, Lituanie, Slovenie, Rep. Ceche, Cossovo, Bosgne e Erzegovine, Slovachie, Serbie, Grecie, Ucraine, Russie).

Intal detai, Mittelfest chest an al varà 28 progjets artistics – 16 musicâi, 7 teatrâi, 5 di danze, che si zontaran i 3 spetacui selezionâts di Mittelyoung – par 20 primis assoludis e talianis, 10 produzions o coproduzions, dut cjapant artistis e artiscj di 15 diviers Paîs de Mitteleurope, dai Balcans e limitrofs. Mittelyoung al ospitarà i 9 spetacui lâts fûr vincidôrs dal bant concludût il passât Fevrâr cun 148 propuestis rivadis di 20 Paîs centrieuropeans e balcanics (Austrie, Belgjiche, Bosgne e Erzegovine, Bulgarie, Cravuazie, Gjermanie, Grecie, Italie, Letonie, Lituanie, Macedonie dal Nord, Montenegro, Paîs Bas, Republiche Ceche, Romanie, Slovachie, Slovenie, Svuizare, Ucraine e Ongjarie): 3 di teatri, 3 di danze, 3 di musiche, in rapresentance di 6 diviersis nazionalitâts (Austrie, Gjermanie, Italie, Lituanie, Paîs Bas, Republiche Ceche).

Il tai de curdele uficiâl di Mittelfest 2022 si tignarà ai 23 di Lui in presince des autoritâts, ma za dai 22 di Lui il program al scomençarà a davuelzi in varis fîi tematics, che insiemi a vegnin a componi la trame dai Incierts.

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui