Lis salis D’Aronco di Palaç Elti a Glemone a daran acet ae mostre personâl “Milions di paveis” de artiste furlane Daniela Pontelli, dai 14 di Març e fintremai ai 6 di Avrîl. La scree de mostre e sarà domenie ai 16 di Març aes 5.30 dopomisdì cuntun intervent dal artist Paolo Clavora, che al è ancje mestri de artiste di Buie.
Pontelli, dopo di un lunc percors artistic indulà che e à esplorât tecnichis antighis e modernis, e je rivade a une espression pitoriche simpri plui libare e personâl. Lis sôs telis grandis, plenis di colôr e di moviment, a dan vite a un ecuilibri perfet invidant cui che lis cjale a pierdisi inte lôr profonditât.
“Dâ acet ae mostre di Daniela Pontelli – e à visât il vicesindic e assessôr ae Culture Flavia Virilli – e je une oportunitât preziose par valorizâ une artiste che e à savût trasformâ il so percors creatîf intun viaç emozionant dentri di colôr, moviment e poesie visive”. (a.d.g.) – 12.03.2025
