Mâr viert, in mostre i confins

Tal ex cine “Cristallo” di Grau, sabide ai 29 si scree la mostre coletive internazionâl “Mare aperto | Dal confine all’orizzonte” (Mâr viert. Dal confin al orizont), un dai ultins apontaments de vincjesime edizion di “Borderland/Orizzonte. Promovude dal circul Arci di Çarvignan, in colaborazion cul comun di Grau, curade di Eva Comuzzi e Orietta Masin, la esposizion e presente al public i risultâts di dôs residencis artistichis fatis tal mês di Jugn tal Cjistiel di S. Maur su lis culinis di Gurize, jenfri il bosc de mont di S. Valantin e il Lusinç. A lavorâ intun lûc strategjic vie pe Vuere grande e al confin jenfri Italie e imperi, tant che la isule di Anfure te lagune di Grau che e à dât acet ai artiscj fint al an passât, dôs feminis: la austriache Lea Radatz e la taliane Irene Dorigotti, in vore ancje doprant archivis, memoriis e elements gjavâts fûr de nature. In mostre fint ai 20 di Setembar ancje lis oparis (pituris, sculturis, fotografiis) di Gaia Agostini, Nadezda Golysheva, Uta Heinecke, Egle Oddo e Giacomo Zorba. (A.I.) – 31.08.2026