Manià, la capitâl des passions ‘uçadis’

La citât dai curtis si piture di zâl e si vistìs di misteri par un fin di setemane ‘lunc’, di joibe ai 20 e fint a domenie ai 23 di Novembar. A Manià a saran cuatri dîs di misteri, tramis e passions impiadis tal segn dal incuintri de leterature ‘di gjenar’ cul artesanât locâl, pe gnove edizion di “Lama e Trama – Incontri nel giallo”, il festival di “incuintris tal zâl” che al instrece scriture, fumet, teatri e divulgazion, mudant la citât intun laboratori di storiis ‘neris’. In dut i apontaments a saran undis, tal teatri, tal cjistiel e te biblioteche, ma ancje tal museu de art dai faris, tirant dentri scritôrs, atôrs e autôrs di fumets intune schirie di incuintris, spetacui, cjaminadis tai misteris de storie dal lûc, laboratoris pes scuelis e visitis vuidadis ma ancje gulizions in stîl “noir”. La rassegne e je un progjet culturâl che al mude la antighe art dai faris di Manià intune ocasion di incuintri par ducj, grancj e zovins, cun ospits di nivel nazionâl: par esempli Massimo Carlotto, un dai plui grancj scritôrs di libris “noi” in Italie, za premiât ae cariere a Manià tal 2005, che al presentarà adun cul atôr Andrea Pennacchi un spetacul speciâl pai trente agns dal sô personaç plui innomenât, “l’Alligatore”. E po dopo, a ‘uçâ’ lis lamis che a son il simbul de citât, il scritôr Domenico Wanderlingh cu la sô ispetore Anita Landi; Cecilia Scerbanenco e Paolo Bacilieri, autôr dal romanç dissegnât “Traditori di tutti”, gjavât fûr di un da lavôrs plui famôs di Giorgio Scerbanenco. E ancje il regjist Antonio Padovan, l’autôr pai zovins letôrs Daniele Nicastro e cetancj altris, tirant dentri ogni dì i students des scuelis e i altris fruts cun zûcs, intervistis, presentazions e ancje une esperience fate cun ducj i sens, cence lûs, tal museu. (A.I.) – 19.11.2025