Lis vitis dai migrants in mostre tal centri “Balducci”

Fint a sabide ai 12 di Otubar, tal centri “Balducci” di Çuian si pues visitâ la mostre “Panta Rei”, su lis “vitis migrantis dilunc de rote balcaniche”, ideade e curade di Anna Clementi e Diego Saccora par capî lis fragjilitâts di cui che al è obleât a lassâ il so Paîs par cirî une gnove vite in Europe, e par contrastâ il disvilup des discriminazions. La mostre, in forme di instalazion che e dopre fotos, sunôrs, panei di test, mapis, videos e ogjets origjinâi cjatâts intai diviers Stâts traviersâts des personis in cjamin, e ricalche lis tapis principâls dal viaç vie tiere dilunc de rote balcaniche, de bande di cui che al cîr di rivâ in Europe: dal moment de partence di cjase al passaç dai confins, aes violencis, ae sospension de vite intun cjamp par rifugjâts, fint a cuant che a rivin a destinazion. (A.I.) – 07.10.2024