Lis sculturis di Ceschia te vile de Claricini

Cincuante agns di cariere di un artist furlan di nivel internazionâl, cressût te suaze dal moviment neorealist daspò de vuere, jentrât daurman a contat cu la creativitât europeane e deventât un riferiment par ducj. A cent agns de nassite di Luciano Ceschia (a Tarcint ai 4 di Jugn dal 1926, muart a Udin tal 1991), vile de Claricini Dornpacher di Butinins di Muimans e à screât une grande mostre,“Luciano Ceschia. A scala umana”, a scjale umane, inmaneade de fondazion de vile par cure di William Cortes Casarrubios, in colaborazion cu la famee Ceschia e cu la poie de regjon F-Vj. Un itinerari che al met in struc la storie di un artist che al à lavorât tal forest e puartât lis sôs oparis in Americhe fint ai ultins agns de vite. La esposizion, vierte fint ai 25 di Otubar,, e propon un percors in trê tapis. Tal parc, discs, sferis e verticâls a son in dialic cu la vile; te galarie, no dome lis sculturis ma ancje grafichis e progjets a mostrin la idee di Ceschia de sculture in rapuart ae architeture e al spazi. Tal zardin dai limonârs, i discs solârs e i gong a contin la dimension plui sufierte de sô ricercje: la scjale umane tant che misure de fragjilitât, ma ancje de resistence. (A.I.) – 01.09.2026