Tal cûr de citât di Udin a son lûcs là che par solit al è dome il cidinôr dal ciment, cu lis machinis che a passin e si fermin e la int che e cjamine svelte. Chei a son i parcaments soteranis, lûcs strents e vueits, tirâts sù cuntun stîl di architeture ‘brutaliste’. Li dentri al è nassût un progjet di poesie urbane ideât e curât di Antonella Bukovaz, presidente “di Stazioni_Postaje” APS. Un progjet che al sfide la velocitât che e stâ difûr par cjatâ tal rivoc dal parc dal Tribunâl di Udin la essence dal lengaç uman e proponi une esperience di imersion totâl. Il public che al larà vinars ai 17 e ai 24, aes 6 e mieze sore sere, al cjatarà “Battiti dal sottosuolo”, il bati sot tiere, un program di incuintris cun trê poetis no ordenaris. Tal spazi cence machinis pe ocasion, il public al sintarà prin di dut il bati dal cûr dal poete, amplificât di un implant, e po dopo la sô vôs che e declame la peraule poetiche scrite. La scolte des poesiis e deventarà une esperience ‘fisiche’ pal public, stant che la acustiche dal lûc e amplifiche dutis lis sfumaduris. Il progjet, mai fat prime di cumò a Udin, al à la poie de Regjon F-Vj pal valôr umanistic, chel de Fondazione Friuli e de SSM adun cul Comun di Udin. (A.I.) – 16.04.2026
Foto di L. Carrer
