Lis lidrîs de nestre storie a van in rêt

La mode, la identitât, la memorie, lis feminis vie pai secui in Friûl: ducj argoments che si cjatin, dongje di altris, intune gnove stagjon di “podcast”, ven a stâi un curt program soredut audio, a teme, di svoltâ in rêt cuant che si vûl, nassude dentri dal Museu etnografic dal Friûl di borc Puscuel a Udin. “Radici in Stoffa”, lidrîs in stofe, e je une schirie di storiis che e instrece mode, memorie, identitât e cussience, dant vôs a chês che si cjatin propit tai tiessûts de nestre tradizion (la prime stagjon e je in rêt su: udinepodcast.it/podcasts/radici-in-stoffa). La seconde stagjon, simpri ideade e fate di Silvia Cacitti, e va insot ae partecipazion des feminis te storie de industrie te societât, cuntune riflession su lavôr, autonomie, cure e indipendence economiche. Si che duncje, une conte che e tache tal passât par fevelâ al dì di vuê. Vinars ai 31 di Zenâr, par presentâ la jessude des gnovis cuatri pontadis, il Museu al darà acet a un event public dedicât ae cressite e ae fuarce des feminis te suaze de mode. Un omaç soredut aes feminis des filandis, che a àn tiessût no dome la sede, ma ancje la dignitât. (A.I.) – 29.01.2026