Lis fotos dal “Timp vueit in preson”

Joibe ai 9, aes cinc e mieze di dopomisdì, al sarà presentât il libri “Ulderica Da Pozzo. I giorni strappati” (I dîs sbregâts), inte sale dal parlament dal cjistiel di Udin. Chest libri al è stât inmaneât pe mostre de fotograf e cjargnele e al conte il “timp vueit in preson” midiant di imagjins fatis propit tal ex repart des feminis in Vie Spalato. La presentazion e sarà fate dal assessôr ae culture Federico Pirone e di Andrea Sandra, Garant dai dirits des personis privadis de libertât personâl. E sarà ancje la ocasion par delineâ lis prossimis iniziativis pe preson. L’event al sarà compagnât di une interpretazion musicâl ufierte de Scuele Superiôr di Musiche “Caterina Percoto”. Prin de presentazion, Ulderica Da Pozzo e Silvia Bianco a ufriran dôs visitis vuidadis de mostre, che e je ospitade tes salis dal Museu furlan di fotografie. (A.I.) – 08.04.2026