Lis caricaturis a tornin tal Palaç dal Fumet

“FACES!”, il Festival Internazionâl des Caricaturis, al torne tal Palaç dal Fumet di Pordenon. Rivât sô tierce edizion, si davuelzarà di joibe ai 16 e fint ai 19 di Avrîl. Sot la direzion artistiche di Federico Cecchin, al colabore cu lis associazions di caricaturis plui impuartantis dal mont: la americane Isca e la austriache Eurocature. Chest an, il festival si concentrarà sul teme “Personis famosis traviers dal multiviers”, un teme cence limits pe imagjinazion, dulà che figuris famosis a son catapultadis in diviersis etis storichis, o metudis in realtâts alternativis e monts imagjinaris. Storie, fantasience, paradòs temporâi e incuintris impussibii: dut al va, fintant che la caricature e presente une version origjinâl e sorprendente dal personaç sielzût. In plui des sezions di dissen, a saran ufierts laboratoris di aprofondiment cun artiscj internazionâi innomenâts. (A.I.) – 15.04.2026