Libris di glesie che a son oparis di art

Tierce esposizion par chest an te suaze de trentesime cuarte edizion dal festival internazionâl di musiche sacre a Pordenon, par cure dal CICP, il Centri iniziativis culturâls cun Presenza e Cultura, daspò di chê dedicade aes figuris sacris di Renzo Tubaro e chê de Vie Crucis. Tal cjistiel di Voleson e je vierte une mostre par cure di Giancarlo Pauletto, inmaneade cu la colaborazion dal Museu diocesan de art sacre. “Libri liturgici della tradizione friulana” e je propit une selezion di volums doprâts de liturgjie: messâi romans, breviaris, antifonaris e altris dal Sîscent fint al Nûfcent, a stampe o ben manuscrits. Ducj volums di grant presi, che si viodin di râr e a son testemonis de fede in Friûl vie pai secui. Lis pagjinis che si podaran viodi a son sioris di incjant estetic: la dople pagjine vierte sul “Canon missae” dal 1696, une dople pagjine di musiche fate a Vignesie tal 1727. Il non che al ven fûr di plui al è chel de famee di artiscj venezians Piccini, soredut la famose muinie Elisabetta o Isabella dal convent di Sante Crôs, ma ancje il flamant Michael Heylbrouck e altris autôrs. (A.I.) – 17.12.2025