E je spiete grande pe Lectio magistralis sul Stât Patriarcjâl di Aquilee che il professôr Franco Cardini al tignarà joibe ai 18 di Setembar aes 8 sot sere dentri de basiliche, event inmaneât dal Teatri Stabil Furlan adun cul Comun di Aquilee, la Fondazion Aquilee e la fondazion “Società per la conservazione della Basilica di Aquileia”.
Par cheste ocasion, Cardini al fevelarà cun Angelo Floramo: i doi medievaliscj a puartaran i spetatôrs intun viaç ae scuvierte de lungje storie dal Stât patriarcjâl dal 1077, an de sô fondazion, e fintremai ae so colade e ae concuiste fate de Republiche di Vignesie tal 1420.
“Il Tsf – al à spleât Lorenzo Zanon, president dal Teatri Stabil Furlan – al à volût inmaneâ e proponi cheste conference come moment di preparazion par Lenghis – festival des lenghis minoritariis che si tignarà a Gurize in Otubar, te suaze de Go! 2025. Il teme de cunvigne si lee une vore ben a chel dal Festival e a chel des minorancis linguistichis, tal particolâr chê furlane, sotlineât ancje la impuartance vude dal Stât Patriarcjâl inte formazion di chê che e sarès daspò deventade la identitât furlane”.
Pal sindic di Aquilee, Emenuele Zorino “dâ acet a Lectio magistralis di Cardini in dialic cun Floramo e je une ocasion par dabon preseose pe citât e o sin braurôs di colaborâ cul Teatri stabil furlan e cui ents che a valorizin la nestre storie”.
Fuart interès pal apontament al è stât palesât ancje di Roberto Corciulo, president de Fondazion Aquilee e di Andrea Bellavite, diretôr de fondazion “Società per la conservazione della Basilica di Aquileia” che par cheste ocasion e à concedût di podê doprâ la Basiliche. (a.d.g.) – 16.09.2025
