La vuere di vuê analizade cu la filosofie

La atualitât tragjiche des vueris e la pussibilitât di une lôr soluzion e je al centri de edizion 2026 de rassegne “Filosofie in citât”, inmaneade de Societât Filosofiche Taliane – Sezion Friûl-Vignesie Julie, e intitulade “La pace dimenticata” (La pâs dismenteade). Pe prime metât dal an a son za programâts trê incuintris cun studiôs e academics impuartants. Il prin, dedicât aes prospetivis de vuere e de pâs, e si davuelzarà domenie ai 8 aes 11 di buinore tal Teatri gnûf “Giovanni da Udine”. I protagoniscj de cunvigne a saran Edoardo Greblo, ex professôr di storie e filosofie, e Carlo Galli, filosof e sienziât politic. Il secont apontament de rassegne si ten tal stes lûc ae stesse ore, domenie al Prin di Març cun Raoul Kirchmayr, autôr di cetantis publicazions, che al esaminarà la costruzion dal mît de vuere “biele”. Il tierç incuintri, “Il movimento della rivoluzione” (Il moviment de rivoluzion), in program ai 17 di Avrîl te sale conferencis de Fondazion Friuli, al analizarà la relazion jenfri rivoluzion, vuere e pâs cu la filosofe Olivia Guaraldo e il storic Marcello Flores. (A.I.) – 06.02.2026