Dopo cetancj ricognossiments internazionâi impuartants, la inovative serie in realtât virtuâl finanziade de ARLeF e rive ancje ae Rome Future Week, puartant la lenghe furlane tal cûr de avanvuardie tecnologjiche
Metude adun in Friûl, dopo di un zîr dal mont, là che e à ricevût cetancj ricognossiments impuartants, la serie imersive in realtât virtuâl “33/16” e rive intun contest pardabon prestigjôs: la aule dal Templi CineVR dal Museu Nazionâl dal Cine di Turin, che e je ospitade inte Mole Antonelliane. Si trate de prime sale cinematografiche permanente in Italie dedicade dal dut ae realtât virtuâl. E je stade metude in vore in colaborazion cun Rai Cinema, e e je il lûc ideâl par valorizâ la nature imersive di une opare che e à za concuistât i festivai internazionâi. Si podarà viodi la prime stagjon al CineVR fin ai 6 di Otubar dal 2025; daspò e vignarà la seconde stagjon, par un altri mês.
No si finìs chi, parcè che ai 18 di Setembar, a Rome, “33/16” e sarà presinte te Casa delle Tecnologie Emergenti de stazion Tiburtine, inte suaze dal Rome Future WeeK – il plui grant event su inovazion e tecnologjie, che al viôt plui di 60 000 partecipants.
Finanziade de ARLeF Agjenzie Regjonâl pe Lenghe Furlane, cu la poie dal Fonts Audiovisîf dal Friûl-Vignesie Julie, la serie e je stade produsude di Red On Productions e coprodusude di Film Srl di Peter Zeitlinger. Direzude di Marco Fabbro e scrite di Enrico Maso, e je bilisiade de fotografie di Peter Zeitlinger, storic diretôr de fotografie di Werner Herzog.
“La sô presentazion al Museu Nazionâl dal Cine no rapresente dome une tape espositive – al à spiegât il president de ARLeF, Eros Cisilino – ma un ricognossiment prestigjôs che al puarte la opare intun lûc simbul dal cine talian e internazionâl, dulà che art e tecnologjie si cjatin insiemi par dissegnâ lis gnovis frontieris dal audiovisîf. De bande nestre – al à sierât – o podìn dome che jessi braurôs parcè che, ancjemò une volte, un progjet sostignût de ARLeF al cjate spazi e merit fûr dai confins de regjon, come che al è just”.
Distribuide di Premiere Film cu la colaborazion di RAI Cinema Channel VR, “33/16” «no je dome une serie, ma pardabon un viaç in imersion, che al esplore la fragjilitât de memorie, i segrets de storie e lis pussibilitâts dal lengaç cinematografic cuant che si cjate cu la inovazion tecnologjiche. Il spetatôr nol è dome osservadôr, ma al è part integrante de storie, realizade a 360 grâts e insiorade di audio spazializât e interativitât», al à spiegât il regjist.
A conferme de sô cualitât, chest progjet inovatîf al à za ricevût ricognossiments internazionâi impuartants, che lu puartin a plen titul fra lis oparis in realtât virtuâl plui preseadis dal panorame contemporani: miôr progjet VR al ShorTS International Film Festival al festival Maremetraggio, al Lusca Fantastic Film Festival e al River Film Festival; selezionade ancje al Bilbao Seriesland Web Fest Festival e al Intervalli Film Festival. (a.d.g.) – 16.09.2025
